“پنجابی قومی کانفرنس بہاولپور”
پنجابی محاذ دی چھتر چھانویں بہاولپور وچ پہلی واری پنجابی قومی کانفرنس دا آہر کیتا گیا، جس وچ ہور پنجابی تنظیماں پنجابی لینگویج موومنٹ، پنجابی ادبی بیٹھک ، ویہڑہ پیر محمد شاہ ، دیس سیوا سنگت ، بہاولپور ڈویژن ادبی سنگت وی آہریاں وچ شامل سن، کانفرنس دے آرگنائزر پنجابی محاذ صوبہ پنجاب دے جنرل سیکرٹری عرفان فرحت چودھری ، مشتاق قمر لہور،تے چوہدری اصغر ورک بہاولپور سن۔ کانفرنس دے سرپرست شیرپنجاب صدرپنجابی محاذ صوبہ پنجاب جواد حسن گل سی۔ کانفرنس دی صدارت پروفیسر احمد علی گورائیہ دی نمائندگی کردے ہوئے وائس چیئرمین پنجابی محاذ ڈاکٹرانصرجمیل نے کیتی، اُچیچے پروہنے صدروسیب اتحاد دھنوٹ حاجی چودھری محمد اسلم ثانی تے سربراہ شعبہ ابلاغیات اسلامیہ یونیورسٹی بہاولپور رانا محمد شہزاد سی ، پنجاب کونسل آف آرٹس بہاولپور دے اشتراک دے نال رشیدیہ ہال وچ کانفرنس ہوئی
کانفرنس وچ پوری بہاولپور ڈویژن وچوں پنجابی آگوواں نیں رلت کیتی، پنجابی محاذ دے وائس چیئرمین چوہدری ذوالفقار گل رحیم یارخان ، سیکرٹری جنرل پنجابی محاذ ندیم ارائیں میاں چنوں، صدر انجمن ارائیاں پنجاب جنوبی حکیم میاں گلزار حسین رحیم یارخان ، چیئرمین بلوچ سنگت عمار نذیر بلوچ رحیم یارخان، چوہدری اکبر گورائیہ بہاولپور، فاروق ندیم بہاولنگر، گل زیب عباسی ہارون آباد ، غفورعابد قریشی بہاولپور، میاں محمد سلیم ہیڈراجکاں یزمان ، چودھری عثمان علی یزمان شامل سن,
کانفرنس دی شروعات تلاوت تے نعت توں ہوئی ، افتتاح صدروسیب اتحاد دھنوٹ حاجی چودھری محمد اسلم ثانی نے کیتا
پہلا سیشن صوفی گائیکی دا سی مشہور صوفی گائیک افضل ناصر چشتی نے ہیر سنائی تے میاں محمد بخش تے خواجہ غلام فرید دا کلام وی پڑھیا گیا،
دوجا سیشن بہاولپور ڈویژن وچ زمیناں اباد کرن والے بابیاں نال گل بات دا سی ، اس سیشن وچ بزرگ واہی واہن چودھری محمد طارق پروہنے سی تے اس سیشن دی میزبانی صدر پنجابی محاذ میاں آصف علی نے کیتی، اپنیاں یاداں سناندے ہوئے چودھری محمد طارق نے دسیا کہ اوہناں دے دادا تے پڑدادا جی نے جنہاں حالات وچ زمیناں اباد کیتیاں اج دے جدید دور وچ وی کوئی اس دا تصور نہیں کر سکدا، پین واسطے پانی کئی کلومیٹر دوروں لیانا پیندا سی ، نہان واسطے پانی نہیں سی لبھدا گرمی نال حال خراب ہویا رہندا سی ، کئی کئی مہینے کوئی ملن نہیں سی آندا، فیر زمین دیاں قسطاں دین جوگی فصل وی نہیں سی ہندی، کئی لوک تے موسم دیاں سختیاں پاروں موت دا شکار ہوئے پر کوئی واپس نہیں ہویا ایسے کارن ایہہ زمیناں اباد ہو سکیاں، اوہناں دیاں درد بھریاں گلاں سن کے حاضرین روندے رہے۔
تیجا سیشن ستلج ویلی پراجیکٹ دا سی جس دے پروہنے سیکرٹری ادارہ تحقیق و تذکرہ پاکستان پرویز صادق سی تے میزبان آر جے ثاقب سی، پرویز صادق نے دسیا کہ ستلج ویلی پراجیکٹ انگریز دا منصوبہ سی جو ریاست بہاولپور نے سرکار کولوں قرضہ لے کے شروع کیتا انگریزاں دا ایہہ بہت وڈا منصوبہ سی جس دی وجہ توں ریاست خسارے دا شکار ہوئی تے پاکستان بنن ویلے وی ریاست کروڑاں روپے دی مقروض سی ایہہ سارا قرضہ زمیناں اباد کرن واے اباد کاراں کولوں ملن والے قسطاں دے پیسیاں نال لایا گیا سی۔ تے عوام نوں زمیناں لین دی کھلی پیشکش کیتی گئی سی شرط صرف اینی سی کہ زمین لین والا اس نوں اباد کرے گا تے قسطاں ادا کرے گا
تیجے سیشن دا سرنانواں بہالپور ڈویژن وچ پنجابی پڑھائی تے اسلامیہ یونیورسٹی بہاولپور وچ پنجابی ڈیپارٹمنٹ دا مسٗلہ سی ۔ سیشن وچ مشہور دانشور فاروق ندیم بہاولپور ، گل زیب عباسی ہارون اباد تے غفور عابد قریشی بہالپور نے گل بات کیتی تے دسیا کہ بہالپور ڈویژن وچ پنجابی زبان نال سوتیلیاں توں وی ودھ سلوک کیتا جا رہیا اے، پنجابی فاضل دا امتحان ختم کر دتا گیا اے ، پنج کالجاں وچ پنجابی دا مضمون باقی رہ گیا اے باقی کالجاں وچ پنجابی دیاں سیٹاں ختم کر دتیاں گئیاں نیں اسلامیہ یونیورسٹی وچ باربار منگاں دے باوجود پنجابی ڈیپارٹمنٹ نہیں بنایا جا رہیا ، بہاولپور ڈویژن دی سب توں وڈی زبان پنجابی ا ے پر پنجابی زبان نوں ای اوس دا حق نہیں دتا جا رہیا اسلامیہ یونیوسٹی وچ پنجابی ڈیپارٹمنٹ دا قیام ساڈا حق اے تے سب کالجاں وچ وی پنجابی مضمون شروع کیتا جانا چاہیدا اے۔
اس سیشن دے اُچیچے پروہنے سربراہ شعبہ ابلاغیات اسلامیہ یونیورسٹی بہاولپور رانا محمد شہزاد نے کہیا کہ پنجابی ڈیپارٹمنٹ دی منگ بہت سوہنی اے پر ساڈے پنجابی گھراں وچ پنجابی بولنا چھڈ دے جارہے نیں، گھراں وچ پنجابی بولی جانی وی بہت ضروری اے، جے گھراں وچ پنجابی بولی ای نہیں جائے گی تے پنجابی پڑھن والے کتھوں آن گے، ایس علاقے دی ہریالی وچ پنجابیاں دا خون تے پسینہ شامل اے ایتھے کئی نسلاں رُل گئیاں فیر جا کے ایہہ خطہ اباد ہویا۔
سیاسی سیشن وچ وچ گل کردے ہوئے سیکرٹری جنرل پنجابی محاذ ندیم ارائیں نے کہیا کہ ساہنوں نوجواناں نوں اپنی تحریک وچ شامل کرنا پئے گا نوجوان ای پنجابی تحریک نوں کامیاب کر سکدے ہین، وائیس چیئرمین پنجابی محاذ چیئرمین پنجابی ادبی بیٹھک چوہدری ذوالفقار علی گل نے کہیا کہ ہُن پنجابی جاگ پئے آ تے اپنا حق لے کے رہن گے اسلامیہ یونیورسٹی وچ پنجابی ڈیپارٹمنٹ ساڈا حق اے تے اپنے ایس حق تو پچھے نہیں ہٹاں گے
اُچیچے پروہنے صدر وسیب اتحاد حاجی چوہدری محمد اسلام ثانی نے کہیا کہ ساہنوں اپنے پنجابی کلچر تے اپنی بولی اُتے مان اے، اسیں اپنی دھرتی واسطے ہر قربانی دیاں گے، سرکار پنجابیاں دیاں منگاں پوریاں کریے، کانفرنس دی صدارت کرن والے ڈاکٹر انصر جمیل نے کہیا کہ پنجابیاں نال ہر دور وچ ذیادتیاں ہُندیاں آ رہیاں دوجے صوبیاں وچ ساڈی ٹارگٹ کلنگ ہو رہی ، فوج تے اعلی افسراں وچ ساہنوں پورا حق نہیں ملدا، حکومت وچ وی غیر پنجابی چھائے ہوئے نیں تے ہر الزام وی پنجابیاں تے لا دتا جاندا اے، جس دا ہُن ہر سطح تے جواب دتا جائے گا۔
کانفرنس دے موقعے تے مولوی لطف علی بہاولپوری پنجابی وسیب سیوا ایوارڈ وی شروع کیتا گیا، پہلا ایوارڈ شاعر ، دانشور ، لکھاری کھوج کار تے ایکٹویسٹ پروفیسر احمد علی گورائیہ ہوراں نوں دتا گیا ، جو اوہناں دے کزن چوہدری اکبر گورائیہ نے وصول کیتا تے شاندار تقریر کیتی ،اک ایوارڈ مہان پنجابی شاعر مصطفی انور ہوراں نوں دتا گیا۔
اس موقعے تے صدر وسیب اتحاد حاجی چوہدری محمد اسلام ثانی، سربراہ شعبہ ابلاغیات اسلامیہ یونیورسٹی بہاولپور رانا محمد شہزاد ، سیکرٹری جنرل پنجابی محاذ ندیم ارائیں،صدر انجمن ارائیاں پنجاب جنوبی حکیم میاں گلزار حسین ، مشہور صوفی گائیک افضل ناصر چشتی تے مشہور دانشور شاعر لکھاری پنجابی سیوک غفور عابد قریشی ہوراں نوں یادگاری شیلڈاں وی دتیاں گئیاں۔
پورے بہاولپورنوں شیر پنجاب صدر پنجابی محاذ صوبہ پنجاب جواد حسن گل نے بینراں تے سٹیمراں نال سجایا ہویا سی۔
س موقعے تے قرارداداں وی منظور کیتیاں گئیاں جنہاں وچ منگ کیتی گئی کہ1= موجودہ مردم شماری نوں مسترد کرکے بائیومیٹرک طریقے نال مردم شماری کروائی جاوے۔
نادرا ڈیٹا
2023
دے مطابق پنجاب دی آبادی
57
فیصد تے ووٹاں دے حساب نال قومی اسمبلی دیاں
155
سیٹاں بندیاں نیں
2023
دی جعلی مردم شماری وچ پنجاب دی آبادی
49
فیصد تےقومی اسمبلی دیاں سیٹاں
134
دسیاں گئیاں جس نوں مسترد کر دے ہاں
2017
دے مقابلے وچ
2023
وچ خیبرپختونخواہ،
سندھ دی آبادی وچ اضافہ
10
فیصد،
بلوچستان وچ
56
فیصد جدکہ پنجاب
وچ صرف
5
فیصد اضافہ دکھایا گیا جو نہیں من دے۔
2 = قومی مالیاتی ایوارڈ چوں پنجاب نوں
48
فیصد دےبجائے
60
فیصد حصہ دین دا مطالبہ کیتا گیا
3 = کالاباغ ڈیم دی فوری تعمیر تے پنجاب نوں اس دی زرعی پیداوار دے حساب نال پانی دین دا مطالبہ کیتا گیا۔
زرعی پیداوار وچ پنجاب دا حصہ
70
فیصد جدکہ اس نوں پانی
49
فیصد دتا جاندا اے
4 = پنجاب وچ افغاناں دی غیر قانونی آبادکاری ختم کر کےاوہناں نوں واپس اوہناں دے ملک بھجوانے دا مطالبہ کیتا گیا۔
5 = پنجاب دے تعلیمی اداریاں وچ دوسرے صوباں دے طلباء واسطے تے اسکالر شپ و فری تعلیم دتی جاندی اے اس لئی پنجاب دے طلباء واسطے وی اسکالر شپ تے فری تعلیم دا مطالبہ کیتا گیا۔
6 = پنجاب وچ طلباء نوں ابتدائی تعلیم پنجابی زبان وچ دین دا مطالبہ کیتا گیا۔
7
اسلامیہ یونیورسٹی بہاولپور وچ پنجابی ڈیپارٹمنٹ دے قیام دی منگ کیتی گئی
8
بہالپور ڈویژن دے سبھ کالجاں وچ پنجابی سیٹاں دی منگ کیتی گئی
9
ریڈیو بہاولپور توں پنجابی پروگرام وی برابر شروع کرن دی منگ کیتی گئی
اخیر تے پنجابی مشاعرہ منعقد ہویا جس دی صدارت پنجابی دی مشہور شاعرہ بشری ناز فیصل آباد نے کیتی، دوجے شاعراں وچ مصطفی انور، مشتاق قمر، عرفان وار ث، غفور عابد قریشی، فاروق ندیم ، عرفان فرحت چودھری، گل زیب عباسی ، افضل ناصر، ڈاکٹر کوثر سندھو تے ہور شاعراں نیں رلت کیتی،
