آوارہ کتوں کو تلف کرنے کیلئے چلائی جانیوالی گولی24سالہ خاتون کو جالگی,

رحیم یارخان( ) آوارہ کتوں کو تلف کرنے کیلئے چلائی جانیوالی گولی کھیتوں میں گھاس کاٹنے والی24سالہ خاتون کے سینے میں جالگی‘ شدید زخمی‘ طبی امداد کیلئے ہسپتال منتقل‘ پولیس واقعہ سے لاعلم نکلی‘

تفصیل کے مطابق موضع بھیٹ اللہ وسایاکی بستی مسلم آباد میں آوارہ کتوں کی بھرمار ہوجانے پر علاقہ مکینوں نے اپنی مدد آپ کے تحت کتوں کو تلف کرنے کی مہم شروع کردی‘گزشتہ روز اسی علاقہ کے رہائشی نوجوان نے آوارہ کتوں کو تلف کرنے کیلئے آتشی اسلحہ کااستعمال کیااور چلائی جانیوالی گولی نزدیکی کھیتوں میں کام کرنے والی24سالہ کوثر بی بی کے سینے میں جالگی‘ جس سے شدید زخمی ہوگئی‘ جسے ورثاء نے فوری طورپر طبی امداد کیلئے شیخ زید ہسپتال منتقل کردیاجہاں طبی امداد کے باوجود حالت تشویشناک بیان کی جارہی ہے‘اس سلسلہ میں رابطہ کرنے پر ہسپتال میں موجود قریبی رشتہ دار نے بتایا کہ علاقہ میں بے شمار آوارہ کتے ہیں جن کو تلف کرنے کیلئے متعدد بار متعلقہ محکموں کودرخواست کی گئی جس پر عملدرآمد نہ ہونے کے باعث علاقہ مکینوں نے اپنی مددآپ کے تحت آوارہ کتوں کو تلف کرنے کیلئے مہم شروع کی ہے”گولی“ مارکرکتوں کو تلف کیاجائے گا۔گزشتہ روز بھی آوارہ کتوں پر چلائی جانیوالی گولی کھیتوں میں کام کرنے والی دوبچوں کی ماں 24سالہ کوثر بی بی کے سینے میں آلگی جسے ہسپتال منتقل کیا گیا ہے‘ جبکہ کارروائی کے لئے پولیس سے کوئی رابطہ نہ کیاگیا ہے۔